Varşava Universitetində Avropada birinci, dünyada isə ikinci — o cümlədən türk dünyasında ikinci — Azərbaycan Dövlətinin IX–XIX əsrlərə aid qədim şərq və qərb xəritələri qalereyasının açılışı keçirilib. Ekspozisiya Avropanın, ABŞ-ın və Asiyanın arxivlərində, kitabxanalarında və kartoqrafik kolleksiyalarında toplanmış nadir xəritələri əhatə edir. Xəritələr Astanadakı L.N. Qumilyov adına Avrasiya Milli Universitetinin Müasir Araşdırmalar İnstitutunun direktoru, professor Muxit-Ardager Sıdıqnazarov tərəfindən toplanıb və araşdırılıb. Qalereya Varşava Universitetinin türkologiya kafedrasının Azərbaycanşünaslıq Mərkəzinə hədiyyə edilib.

Təntənəli tədbirdə Türk Mədəniyyəti və İrsi Beynəlxalq Fondunun prezidenti Aktota Raimqulova, Azərbaycan səfiri Nərgiz Qurbanova, Qazaxıstan səfiri Nurlan Calğasbayev, Türkiyə səfiri Rauf Alp Denktaş və Özbəkistan səfiri Əmirsəid Aqzamxocaev iştirak ediblər.

Layihə müəllifi Asiya və Afrika Ölkələrini Öyrənmə Fakultəsinin dekanı, professor Aqat Barea-Stajinskayaya və Azərbaycanşünaslıq Mərkəzinin rəhbəri Şahla Kazımovaya təşəbbüsü dəstəklədikləri üçün təşəkkürünü bildirib.

Xatırladaq ki, Azərbaycan Dövlətinin qədim şərq və qərb xəritələri qalereyasının birincisi 2023-cü ildə türk dünyasının mənəvi paytaxtı olan Türküstanda açılmışdır.

Kolleksiyanın Varşavaya daşınması və logistika hazırlığı Astanadakı Azərbaycan Mədəniyyət Mərkəzinin rəhbəri Mair Rzayevin dəstəyi ilə həyata keçirilib. Layihənin rəhbəri Muxit-Ardager Sıdıqnazarovdur. O, bu ilin 22 may tarixində STEM Mərkəzində olub. Sıdıqnazarov — görkəmli alim, siyasi elmlər doktoru, professor, Astanadakı L.N. Qumilyov adına Avrasiya Milli Universitetinin Müasir Araşdırmalar İnstitutunun direktorudur. Həmin görüş tələbələr, müəllimlər və türk dünyasının tarixi, geosiyasəti və kartoqrafiyası ilə maraqlanan tədqiqatçıları bir araya gətirib.